Tuesday, May 19, 2015

ကျွန်တော့်အတွေး မွေးစားပေးကြပါ

 


နန္ဒ၀င်း (ဆေး-၁)

ကျွန်တော် တာဝန် ကျတဲ့ အင်္ဂပူ  မြို့ကလေးမှာ ဆင်းရဲနွမ်းပါးပြည်သူ များ အတွက် အဓိက ရည်စူးပြီး တန်ဖိုး သင့် ညစာ ဆိုတဲ့ အစီအစဉ် ကလေးကို ၁၃၇၇ ခုနှစ် နှစ်ဆန်း တစ်ရက်နေ့နောက်ပိုင်း က စတင်ခဲ့ပါတယ်။ 

ထမင်းတွေ သီးစုံ ပဲကုလားဟင်းတွေ ၀က်သားတွေ ကြက်သားတွေ ချက် ဆိုက်ကား တစ်စီးပေါ် တင် စေ တနာ့ ၀န်ထမ်းများ က နွမ်းပါးတဲ့ ရပ်ကွက်တွေကို တွန်းသွားပြီး ထမင်းနှင့် သီး စုံ ကုလားဟင်း ဆို နှစ်ရာ ကျပ်၊ ထမင်းနှင့် ၀က်သားဟင်း ဆို သုံးရာကျပ်၊ ထမင်းနှင့်ကြက်သားဟင်း ဆို ငါးရာကျပ် အသီးသီး ရောင်း ချပေးခဲ့ ပါတော့တယ်။ 

အဓိက ကျွန်တော် ရည်ရွယ်တာ က တစ်နေ့တာ ပင်ပန်းနွမ်းနယ်နေကြ တဲ့ တစ်နေ့ လုပ် တစ်နေ့စား ဆင်းရဲနွမ်းပါး သူ မိသားစုများ ဟာ သူတို့ရဲ့ ညနေစာ ကို အာဟာရ တန်ဖိုး ပြည့်ပြည့်နှင့် စားသောက်နိုင်စေရေး ပဲ ဖြစ်ပါတယ်။

ယခင့် ယခင် ကျွန်တော်တို့ သွားရောက် မရောင်းခင် ကဆို အာဟာရ စံညွှန်း အနည်းငယ်သာ ပါတဲ့ ငါးပိ ချက် (ခုနောက်ပိုင်း ငါးပိ ပါ ဈေးတက်ကုန် လို့ ငါးပိ နည်းနည်း ကို အရည်ဖျော်) နှင့် မိသားစု တစ်စု လုံး ဖြစ် သလိုစားခဲ့ ရပါတယ်။ 


ခုတော့ ငါးပိချက် ငါးပိဖျော်သာ မက အသားဓာတ်၊ ကစီဓာတ်၊ အဆီဓာတ်၊ ဗီတာမင်နှင့် သတ္တုဓာတ်တွေ အကုန် ပါတဲ့ သီးစုံ ပဲကုလားဟင်း ကိုတော့ ငွေနှစ်ရာကျပ် (သူတို့ အဆို  ဆို ထင်းဖိုး သာသာနှင့်) စားသောက်နိုင်ခဲ့ ပါပြီ။ 

 ရောင်းချပေးနေ တဲ့နောက် ကို တစ်ရက်လောက် လိုက် ကြည့်သူတိုင်း ပီတိဖြစ်ကြ ရပါတယ်။ နွမ်းနွမ်း ပါးပါး သူတို့ဟာ ဆိုက်ကားနား ကပ်လာတယ်။ ပြီးရင် ဟဲ့ကြက်သားအိုးပြ ပါဦး၊ ၀က်သားအိုးပြ ပါဦး၊ ဒီနေ့ အသားကောင်း သားဟဲ့၊ ကဲကဲ သီးစုံ ကုလားဟင်းပဲ ထည့် ဆိုတာမျိုးလေးတွေ။ 


ဒီနေ့တော့ ပိုက်ဆံ ပိုတယ်ဟေ့၊ ကြက်သားနှင့် စားမှာ ဟဲ့၊ ၀က်သားလောက်တော့ ဒီနေ့စား မှ ဖြစ်မယ် ဆို တဲ့ အသံတွေ ဟာ ပင်ပန်းခံရောင်းချပေးနေတဲ့ စေတနာ့ လုပ်အားရှင်တွေ အတွက် အားဆေးတွေပါပဲ။ ၀က်သား ကြက်သားနှင့် ၀ယ်ပြီးပေမယ့် ထမင်းပေါ် သီးစုံ ကုလားဟင်းလေး ဆမ်းပါဦး ဆိုလည်း အမြတ် အတွက် ရောင်းနေတာ မဟုတ်တဲ့ ကျွန်တော့်လူတွေက ဆမ်းပေးလိုက်တာပါပဲ။ 

ဆိုက်ကားတစ်စီးနှင့် အိမ်ခြေ ၁၀၀ ကိုဘဲ အခြေပြု ရောင်းချနေရာကနေ ခုဆို ဆိုက္ကား လေးစီး အိမ်ခြေ ၄၀၀ အထိကို တိုးချဲ့နိုင်ခဲ့ပါပြီ။ ဆိုခဲ့သလိုပါပဲ၊ စိစိစစ်စစ် ထည့်ပေးတာမဟုတ်ဘဲ ပိုပိုသာသာ ထည့်ပေးတတ်တဲ့ လုပ်အားရှင်တွေကြောင့် အမြတ်ကတော့ ဆိုက္ကားတစ်စီး တစ်နေ့ (၁၅၀၀-၂၀၀၀) လောက်ပဲ မြတ်ပါတယ်။

ဒါပေမဲ့ ဒါဟာ အမြတ်ကြမ်းတယ် ဆိုရ ပါ့မယ်။ ဆိုက္ကားတစ်စီး အတွက် တစ်နေ့ ရင်းနှီးငွေ ဟာ ၁၅၀၀၀ ကနေ ၁၈၀၀၀ အထိ ပဲ ရှိပါတယ်။ အနည်းဆုံး ၁၀ ရာခိုင်နှုန်း နေ့စဉ်မြတ်တယ် ဆိုကတည်းက အမြတ်ကြမ်း တာပါပဲ။ ကောင်းမွန် တဲ့ စီးပွားရေးလုပ်ငန်း တစ်ခုလို့ ဆိုရမှာပါ။ 


အနယ်နယ် အရပ်ရပ် ကလည်း စိတ်ဝင် တစားနှင့် အရင်း အနှီးတွေ မ,တည်ပေး စေတနာ့ ၀န်ထမ်းတွေကို လက်ဆောင်တွေ ၀ယ်ပေးကြတာ တစ်လ အတွင်း မှာ သိန်းငါးဆယ်လောက် အလှူငွေ ရခဲ့ရတာ အားရစရာ ပဲဖြစ်ခဲ့ပါတယ်။ 

တန်ဖိုးသင့် ညစာ အားပေးနေတဲ့ ဆင်းရဲနွမ်းပါး မိသားစုတွေကို သီးသန့်နေ့ရက် ကလေးတွေမှာ ဟင်းသက် သက်ချက်လှူပေးပါ ဆိုလို့ ဘဲဥချဉ်ဟင်း၊ ကြက်သားဟင်း၊ ၀က်သားဟင်း စတာတွေကို ချက်လှူပေးခဲ့ ရတာ လည်း ရှိခဲ့ပါတယ်။ 

ကျွန်တော် စည်းရုံး ထားတဲ့ စေတနာ့ လုပ်အားရှင်တွေ ကလည်း ပံ့သကူသား ရအောင် (ရန်ဘေးမဲ့ အလှူဖြစ်အောင်) စီမံနိုင်ခဲ့ခြင်းကို လည်း ဂုဏ်ယူစွာ မှတ်တမ်းတင် ရမှာပါ။ အလှူရှိတဲ့နေ့ လည်း တန်ဖိုးသင့် ညစာဟာ အရောင်း မပျက်ပါဘူး။ ပြည်သူတွေ ကလည်း အားပေး မပျက်ပါဘူး။ အိုးမှောက် ခွက်လှန် ကုန် စင်အောင် အားပေးကြပါတယ်။


ဒီနေရာမှာ ရောင်းတယ် ဆိုတာ ကလည်း ပထမ အစ ဆောင်းပါးတွေမှာ ကျွန်တော်ဖော်ပြ ခဲ့သလိုပါပဲ။ 


(၁) ငွေရင်း မပျောက် ရေရှည်လုပ်နိုင်မယ်။ 
(၂) စားသုံးသူတွေမှာ ဂုဏ်ရှိစေပါတယ် (ပိုက်ဆံပေး ၀ယ်စားတာ အလကား စားတာ မဟုတ်ဘူး)။ 
(၃) လုပ်ငန်း အရောင်းသွက် လာရင် လုပ်ကိုင်သူ စေတနာ့ လုပ်အားရှင်တွေ အတွက် အထောက် အပံ့ဖြစ်စေ ပါလိမ့်မယ် (ကြက်သား၊ ၀က်သားကို နွမ်းပါးသူတွေ ရဲ့ မျှော်လင့်ချက် အဖြစ်သာ ရောင်းချပေးနေ တာပါ။ သုံးရာ ငါးရာ ဆိုတာ မမြတ်ပါဘူး။ ရှုံးပါတယ်။ 

တကယ်လို့ သီးစုံ ပဲကုလား ဟင်း တစ်မျိုးတည်း ထမင်းနှင့်ရောင်းလို့ ကတော့ နှစ်သောင်းရင်း ငါးထောင်သေ ချာမြတ် ပါတယ်။ ခုတော့ သူ့ အမြတ်က ကြက်သား ၀က်သား အတွက် မျှခံပေးနေရလို့ အမြတ်နည်းနေ တာ ဖြစ် ပါတယ်။

သတင်း မီဒီယာတွေ လူမှုကွန်ရက်တွေ က တစ်ဆင့် တန်ဖိုးသင့် ညစာ ကို သိကြပြီး အနယ်နယ် အရပ်ရပ် က စိတ်ဝင် တစား ဖုန်းဆက်ကြ မေးကြ မက်ဆေ့ခ်ျပို့ကြ တာလည်း ကျေနပ် စရာပါပဲ။ လိုက်ပါ လုပ်ဆောင် လိုသူများပေမယ့် နေ့စဉ် ချက်ရပြုတ်ရရောင်းရ ဆိုတော့ အချိန်မပေးနိုင်ကြပါဘူး။ 


ဒီ့အတွက်ကြောင့် လုပ်ချင်တယ် ခက်နေတယ် ဆိုတဲ့ မိတ်ဆွေများ ကို အကြံလေးတွေ ပေးချင်ပါတယ်။ ဒီအကြံတွေပေးနိုင်တာ ကလည်း ကျွန်တော့် အိပ်မက် ထဲမှာ တန်ဖိုးသင့်ညစာကလေးကို မက်နေခဲ့တာ သုံးလေးနှစ်ကြာခဲ့မှ အောင်မြင်ခဲ့တာဆိုတော့ ကြိုတွေးမိထားတာလေးတွေပါ။

(၁) ကျွန်တော် တို့လို ဆိုက်ကားပေါ် တင်ရောင်းမှ ရောင်းဖြစ်မှာ မဟုတ်ပါဘူး။ နွမ်းပါးသူ များတဲ့ လက်လု ပ် လက်စား များတဲ့ နေရာတွေမှာ ဆို တစ်ပိုင် တစ်နိုင် မိမိ အိမ်ရှေ့မှာတင် တန်ဖိုးသင့် ညစာ ဆိုင်ကလေး ဖွင့်နိုင် ပါတယ်။ မိမိပတ်ဝန်းကျင်မှာ လက်လုပ် လက်စား အိမ်ခြေ ၁၀၀ ရှိရင် ဖွင့်လို့ ရပါပြီ။ အဲဒါဆိုရင် လိုက်လံရောင်းရတဲ့ ဒုက္ခ ကင်းဝေးသွားပါပြီ။ 


တစ်ခု ရှိတာက အိမ်ဆိုင်ဖြစ်လို့ စားသောက် စရာ ပုဂံ ခွက်ယောက် အိုး၊ ခုံ၊ စားပွဲခင်း အစရှိသော ဆိုင်ခင်း ပစ္စည်း များ လိုအပ် ပါလိမ့်မယ်။ ကျွန်တော်တို့ အနေနဲ့ အဲဒီလို အိမ်ဆိုင် ဖွင့်မယ် တန်ဖိုးသင့် ညစာ အမည်ကို ယူမယ်၊ ဈေး ကလည်း ကျွန်တော်တို့ လို သီးစုံ+ထမင်း ၂၀၀၊ ၀က်သားနှင့် ၃၀၀၊ ကြက်သားနှင့် ၅၀၀ ရောင်း မယ် ကျွန်တော်တို့ ချက်သလို စံချိန် စံညွှန်းနှင့် ချက်မယ် ဆိုရင် (အချို မှုန့် မသုံး စားအုန်းဆီ မသုံးခဲ့ရင်) အိုးတစ်စုံ စာရယ်၊ ၉ လက်မ စတီးဇလုံ ၂၀ ရယ်၊ (ထမင်းဟင်း ပုံစားရန်) ငွေ အရင်း သုံးသောင်းရယ် ဆိုင် အမည် ဆိုင်းဘုတ် ဗီနိုင်း တို့ကို ထောက်ပံ့ပါ့မယ်။ 

အဆင်ပြေမယ် ဆိုရင် တန်ဖိုးသင့် ညစာ အကြောင်းကို သက်ဆိုင်ရာဒေသတွေ မှာ လာရောက်ရှင်းပြ ချင် ပါတယ်။ (ကျွန်တော် တာဝန်ကျရာ အင်္ဂပူ နဲ့လည်း နီးစပ်မယ်၊ ကျွန်တော် လည်း အားမယ် ဆိုရင်ပေါ့။ ကျွန်တော် ကလည်း ဆေးရုံဆေးခန်း ခွဲခန်း ဇီဝိတဆေးခန်း ရုံး အလုပ်များ အစည်း အဝေးလူကြီး ခရီးစဉ်နှင့် တစ်နေ့ တစ်နေ့ အသက်တောင် ခိုးရှူ နေရတော့ အာမ မခံနိုင်ပါ။ စိတ်ထဲ ကတော့ ရှိနေပါတယ်။)

(၂) ငွေကြေး တတ်နိုင်သူ သူဌေး များ လုပ်ငန်းရှင် များ အနေဖြင့် အဲဒီလုပ်ငန်း ကို ၀န်ထမ်းများ ခန့်ထားပြီး လုပ်နိုင် ပါတယ်။ ကျွန်တော့် မှာသာ လုံလောက်တဲ့ငွေကြေး ရှိရင် အဲဒီလို လုပ်မှာပါ။ နေရာတစ်ခု ရှာမယ်။ ချက်ပြုတ်တဲ့ သူတွေ ခန့်မယ်၊ ချက်မယ် မိသားစု လေးငါး ရာစာ ချက်မယ် (လက်ရှိ ကျွန်တော်တို့ ချက်နေတာ ၃၀၀ စာ) Light Truck ပေါ်မှာတင်မယ်။ နွမ်းပါးတဲ့နေရာတွေကို လိုက်ရောင်းမယ်။ 


အရောင်း ၀န်ထမ်းပါ ခန့်မယ်။ မြတ်မြတ် ရှုံးရှုံး လုပ်ငန်းစု တစ်ခု အနေနှင့်ကို လုပ်မယ် (ကျွန်တော့်တွက် ချက် မှု အရ စီးပွားဖြစ် မမြတ်ပေမယ့် လုံးဝ မရှုံးပါဘူး။ စီးပွားရေး သမားကြီးတွေ နယ် အသီးသီးမှာ တစ်နှစ် စာ လိုက်လံ အလှူပေးနေတဲ့ငွေရဲ့ တစ်ဝက်လောက်တောင် ရင်းစရာမလိုပါဘူး။ 

တစ်လစာ ဧည့်ခံပွဲတွေမှာ အသုံးပြုမယ့်ငွေထဲ က အနည်းငယ် ချွေတာ လိုက်ရင်တောင် ဖြစ်နိုင်ပါတယ်)
ကျွန်တော်ကတော့ -င်မနိုင်ဘဲ ပဲဟင်း စားလိုက် ပါဦးမယ်။ အကယ်၍များ စီးပွားရေး သမားများ က ရေရှည် ပရဟိတ အဟာရ တန်ဖိုးသင့် ညစာ လုပ်ချင်တယ် ဆိုပါရင် မည်သည့်နေရာ မှာ လုပ်ချင်တယ် သာပြောပါ လိုအပ်ချက် ကုန်ကျ စရိတ် အားလုံးကို တွက်ချက်ပြီး အနုစိတ် စီမံချက် (microplan) အခမဲ့ ဉာဏ ဒါနပြုပါရစေ ဆွဲပေးပါ့မယ်။


(၃) တစ်ယောက်အားဖြင့် ယူသော် မရ တစ်သောင်း အားဖြင့် ယူသော် ရ၏ ဆိုတာ ကြားဖူးမှာပါ။ ညီညွတ် တဲ့ ရပ်ကွက်တွေ မှာ ဆို ဆွမ်းချက် အသင်းတွေ နေ့တိုင်း ရှိပါတယ်။ ဆွမ်းချက် အသင်းလိုက် စိတ်တူကိုယ်တူ ရင် တန်ဖိုးသင့် ညစာကို အလှည့်ကျချက်လို့ ရပါတယ်။ 


ဥပမာ တနင်္လာညနေတိုင်း (--) လမ်း ထိပ် ဓမ္မာရုံ တွင် တန်ဖိုးသင့် ညစာရောင်း သည် စသည်ဖြင့်ပေါ့။ အဲဒီလိုဆို လည်း ကျွန်တော်တို့ စခဲ့တဲ့ တန်ဖိုးသင့် ညစာ မိသားစု က တတ်စွမ်း သရွေ့ လာရောက် ခွဲဝေ လှူဒါန်းပေးသွား မှာဖြစ်ပါတယ်။

မည်သည့်နည်း ကို သုံးသည်ဖြစ်စေ အရေးအကြီးဆုံး ကတော့ Food Safety ပါပဲ။ လတ်ဆတ်တဲ့ အသား သီးနှံ ကျန်းမာရေးနှင့် ညီညွတ်တဲ့ ပါဝင် ပစ္စည်းများ သန့်ရှင်းတဲ့ ကိုင်တွယ်မှု ကျန်းမာပြီး ကူးစက်ရောဂါကင်း တဲ့ အစား အစာပြင်ဆင် ချက်ပြုတ်သူများ အားလုံး လိုအပ်ပါတယ်။ စေတနာ က ဝေဒနာဖြစ်လို့ မရပါဘူး။ 


ငယ်ငယ်တုန်း က စာထဲမှာ သင်ရသလို အင်္ဂလန်က   မေရီ ဆိုတဲ့ ဘုရားရှိခိုးကျောင်း က ထမင်းချက် အဘွားကြီး ကနေ တစ်ဆင့် တိုက်ဖိုက်ရောဂါ (အူရောင် ငန်းဖျားရောဂါ) ကပ်ရောဂါ အသွင်ကူးစက် ခံရဘူး ပါတယ်။ တိုက်ဖွိုက်မေရီ ဆိုတာ နာမည်ကြီးပါပဲ။ ကျွန်တော့် မှာ စာအုပ်လေး တစ်အုပ် ( ခုတော့ ကွန်ပျူတာ ထဲမှာ Folder လေး တစ်ခုပေါ့) ရှိပါတယ်။ မမက် ရသေးသော အိပ်မက် များပေါ့။

 အခါအခွင့်သင့် ကြုံကြိုက် လို့ တွေးမိတဲ့ အတွေးတိုင်း ကို ချရေးထားတာပါ။ သတိရတဲ့ အခါတိုင်း လှန် ဖတ်ဖြစ်တော့ အတွေးဆက် မပြတ်တော့ပါဘူး။ ခု တန်ဖိုးသင့် ညစာကလည်း အဲဒီ အတွေးထဲ ကနေ ပေါက်ဖွား လာတဲ့ ရင်သွေးငယ် တစ်ဦးပါပဲ။ (ဆရာလို အစ်ကိုလို ရင်းနှီး တဲ့ စာရေးဆရာကြီး တစ်ဦး ရဲ့ စကားငှား ဆိုရရင် ကိုးလ ဆယ်လ လွယ်ထား ရတဲ့ ရင်သွေးကို မိခင်ဟာ မနေနိုင်တော့ ဘဲ မွေးထုတ် လိုက်ရ သလို ရင်ထဲက မနေနိုင် မထိုင်နိုင် ဥဒါန်းကျူးရင့် သလို မထွေး ထားနိုင်လို့ အန် ထွက်လာတဲ့ အတွေးဖြစ်ပါတယ်)

တန်ဖိုးသင့် ညစာ လုပ်ငန်းကလေး ဟာ ကျွန်တော့ အတွေး ရင်သွေးဖြစ်ပေမယ့် အများပြည်သူ အတွက် အကျိုးရှိမယ် ဆိုရင် မည်သူ မဆို ခေါ်ယူမွေးစားနိုင်ပါတယ်။ လိုက်လံ လုပ်ဆောင်နိုင်ပါတယ်။ 


ကျွန်တော့် ကိုလည်း ခိုင်းနိုင်ပါတယ်။ ဆင်းရဲတာတွေ ကို မပျောက်နိုင်သေးပေမယ့် ကျွန်တော်တို့ ရဲ့စေတနာတွေကြောင့် ပြည်သူတွေကြား ချို့တဲ့တာတွေ ကိုတော့ လျော့ပါး သွားအောင် ဆောင်ရွက်နိုင် မယ်လို့ ယုံကြည်မိနေပါတော့တယ်။ ကျေးဇူးတင်ပါတယ်။

No comments:

Post a Comment