ပြည်ပသို့ သွားရောက် အလုပ် လုပ်ကိုင်ကြသူများ သတိပြုဖွယ်

ကမ္ဘာ့ကုလသမဂ္ဂ လူဦးရေ ရန်ပုံငွေ အဖွဲ့၏ ၂ဝ၁ဝ ပြည့်နှစ်က ထုတ်ပြန်ခဲ့သော ဆန်းစစ်ချက်များ အရ မြန်မာနိုင်ငံ အတွင်း ရန်ကုန်နှင့် မန္တလေး ကဲ့သို့သော မြို့ကြီးများသို့ ရွှေ့ပြောင်း အလုပ်လုပ်ကိုင်သူ ဦးရေသည် လေးသန်းခန့် ရှိကြောင်း သိရသည်။

မြန်မာရွှေ့ပြောင်း လုပ်သားများသည် အိမ်နီးချင်း နိုင်ငံများ ဖြစ်သည့် ထိုင်း၊ တရုတ်၊ စင်ကာပူနှင့် မလေးရှား နိုင်ငံများသို့ သွားရောက် လုပ်ကိုင်လျက် ရှိကြရာမှ ဂျပန်နှင့် အရှေ့အလယ်ပိုင်း နိုင်ငံများ အပါအဝင် နိုင်ငံပေါင်း ၁၅ နိုင်ငံသို့ သွားရောက် အလုပ်လုပ်ကိုင်လျက် ရှိသည်။ အလုပ်သမား၊ အလုပ်အကိုင်နှင့် လူမှုဖူလုံရေး ဝန်ကြီးဌာန၏ ၂ဝ၁၂ ခုနှစ် အတွင်းက စာရင်းများအရ နိုင်ငံရပ်ခြားသို့ သွားရောက် အလုပ်လုပ် ကိုင်ကြသော ရွှေ့ပြောင်း လုပ်သား သုံးသန်းခွဲ ရှိသည်။

မြန်မာရွှေ့ပြောင်း အလုပ်သမားများ အများဆုံးမှာ အိမ်နီးချင်း ထိုင်းနိုင်ငံသို့ တရားဝင် သွားရောက်ကြသူများနှင့် တရားမဝင် သွားရောက် အလုပ် လုပ်ကိုင်ကြသူ စုစုပေါင်း နှစ်သန်းခွဲခန့် ရှိသည်။ ရွှေ့ပြောင်း အလုပ်သမား အများစုသည် မိမိတို့ သွားရောက် အလုပ်လုပ်ကိုင်မည့် နေရာဒေသ၏ အခြေအနေကို သေချာစေ့ငုစွာ မသိဘဲ  သွားရောက် လုပ်ကိုင်ကြခြင်း ဖြစ်သဖြင့် လူကုန်ကူးသူများ၏ မက်လုံးပေး လှည့်ဖြားခြင်း ခံကြရသူများလည်း ရှိသည်။ 


ယခင်က အမျိုးသမီးငယ်လေး များသာ လူကုန်ကူး ခံရသော်လည်း နောက်ပိုင်းတွင် အမျိုးသားများနှင့်  ကလေးငယ်ကိုပါ ပစ်မှတ်ထား လုပ်ကိုင်ကြကြောင်း တွေ့ရသည်။ ပြည်ပသို့ သွားရောက် အလုပ်လုပ်ကိုင်မည် ဆိုပါက လူကုန်ကူးသူများ၏ လှည့်ဖြားခြင်း မခံရလေအောင် အသေအချာ စုံစမ်း လေ့လာပြီး တရားဝင် လမ်းကြောင်းက သွားရောက် လုပ်ကိုင်ခြင်းသည်သာ အန္တရာယ် အကင်းဆုံး ဖြစ်သည်။

မြန်မာရွှေ့ပြောင်း အလုပ်သမားများနှင့် စပ်လျဉ်းသော အလုပ်ရုံ ဆွေးနွေးပွဲကို ၂ဝ၁၂ ခုနှစ် ဒီဇင်ဘာ အတွင်း က နေပြည်တော်ရှိ အပြည်ပြည် ဆိုင်ရာ ကွန်ဗင်းရှင်း ဗဟိုဌာန၌ မြန်မာနိုင်ငံ ရှိ နိုင်ငံ တကာ ရွှေ့ပြောင်း သွားလာ နေ ထိုင်ခြင်း ဆိုင်ရာအဖွဲ့ (IOM) နှင့် အလုပ်သမား၊ အလုပ်အကိုင်နှင့် လူမှုဖူလုံရေး ဝန်ကြီးဌာနတို့ ပူးပေါင်း ကျင်းပ ခဲ့ သည်။ 

အလုပ်ရုံ ဆွေးနွေးပွဲကို ရွှေ့ပြောင်း အလုပ်သမားများအား အကာအကွယ် ပေးရေးတွင် အပြည်ပြည် ဆိုင်ရာ အလုပ်သမား ရေးရာ ''စံ'' များနှင့် မူဝါဒများနှင့် အညီ အကာ အကွယ် ပေးရေး၊ လုံခြုံ စိတ်ချရသော ရွှေ့ပြောင်း လုပ်ကိုင်မှု ဖြစ်ရေး၊ အလုပ် သမားများ၏ မိသားစုများ လူမှုစီးပွားရေး ဘဝ မြင့်မားလာစေရေး တို့အတွက် ရည်ရွယ် ကျင်းပခဲ့ခြင်း ဖြစ်သည်။ အလုပ်ရုံ ဆွေးနွေး ပွဲတွင် ရွှေ့ပြောင်း အလုပ် လုပ်ကိုင်ခြင်း ဆိုင်ရာ မူဝါဒ (၉)ချက်ကို အတည်ပြု ချမှတ်နိုင်ခဲ့သည်။

နိုင်ငံတကာ ရွှေ့ပြောင်း သွားလာနေထိုင်ခြင်း ဆိုင်ရာ အဖွဲ့အစည်း (IOM) ကို ၁၉၅၁ ခုနှစ်တွင် စတင် တည်ထောင်ခဲ့သည်။ ရွှေ့ပြောင်း သွား လာ နေထိုင်မှု ဆိုင်ရာ လုပ်ငန်းများကို ဦးဆောင် ဦးရွက်ပြု၍ အစိုးရ အဖွဲ့အစည်းများ၊ အစိုးရ မဟုတ်သော အဖွဲ့အစည်းများဖြင့် ပူးပေါင်း ဆောင်ရွက်လျက် ရှိသည်။ 

အဖွဲ့ဝင် ၁၄၈ နိုင်ငံရှိသော အဖွဲ့အစည်း ဖြစ်သည်။ ၂ဝ၁၂ ခုနှစ် နိုဝင်ဘာ ၂၇ ရက်တွင် ကျင်းပသော  (IOM) အဖွဲ့၏ (၁ဝ၁)ကြိမ်မြောက် ညီလာခံတွင် မြန်မာနိုင်ငံကို အဖွဲ့ဝင် နိုင်ငံအဖြစ် အသိအမှတ် ပြုခဲ့ပြီး ဖြစ်သည်။ (IOM) အဖွဲ့သည် သက်ဆိုင်ရာ ဝန်ကြီး ဌာနများနှင့် ပူးပေါင်း၍ အကူအညီ လိုအပ်သော ရွှေ့ပြောင်း လုပ်သားများ၏ ရွှေ့ပြောင်းခြင်းနှင့် ဆက်နွှယ်သော လူသားချင်း စာနာထောက်ထားမှု အကူအညီများ ပေးအပ်လျက် ရှိသည်။

ကမ္ဘာ့ ကုလသမဂ္ဂ၏ ခန့်မှန်းတွက်ချက်မှု အရ  ကမ္ဘာ့ လူဦးရေ သန်း ၇ဝဝဝ ကျော်ရှိရာတွင် ရွှေ့ပြောင်း လုပ်သားဦးရေ ၂၁၄ သန်းရှိနေပြီး ၂ဝ၅ဝ ပြည့်နှစ် အရောက်တွင် ရွှေ့ပြောင်း လုပ်သားဦးရေ သန်း ၄ဝဝ အထိ ရှိလာနိုင်ကြောင်း သိရသည်။

မလေးရှားနိုင်ငံတွင် တရားမဝင် နေထိုင် အလုပ်လုပ်ကိုင် နေသူများအား အာဏာပိုင်များက စက်တင်ဘာ ၁ ရက်မှစ၍ အထူး စီမံချက်ဖြင့် ရှာဖွေ ဖော်ထုတ် စစ်ဆေးခဲ့ရာ အင်ဒိုနီးရှား၊ မြန်မာ၊ ဘင်္ဂလားဒေ့ရှ်၊ နီပေါ၊ ကမ္ဘော ဒီးယား၊ ဗီယက်နမ်၊ အိန္ဒိယ၊ ပါကစ္စတန်၊ ဖိလစ်ပိုင်၊ တရုတ်၊ နိုင်ဂျီးရီးယား နှင့် ထိုင်းနိုင်ငံတို့မှ တရားမဝင် လာရောက်နေထိုင် လုပ်ကိုင်သူ ၂၄ဝဝ ဦး တွေ့ရှိခဲ့သည်။ မြန်မာ နိုင်ငံသား ၅၅၅ ဦးတို့အား  မြန်မာနိုင်ငံ သံရုံးနှင့် ညှိနှိုင်း ဆောင်ရွက်၍ မြန်မာနိုင်ငံသား ဖြစ်ကြောင်း စိစစ် တွေ့ရှိသူများကို မြန်မာနိုင်ငံသို့ ပြန်လည်ခေါ်ယူရန်   ဆက်လက် ဆောင်ရွက်သွားမည်ဖြစ် ကြောင်း သိရသည်။

သို့ဖြစ်၍ ပြည်ပသို့ သွားရောက် အလုပ်လုပ်ကိုင်ကြမည် ဆိုသော် မိမိ သွားရောက် လုပ်ကိုင်မည့် နေရာဒေသ အခြေအနေ၊ လုပ်ကိုင်ရမည့် အလုပ် အတွက် အာမခံချက် စသည်တို့ကို ဂဃနဏ သိရှိပြီးမှ တရားဝင် သွားရောက် လုပ်ကိုင်ကြခြင်းဖြင့်  ပြဿနာ တစ်စုံတစ်ရာ ပေါ်လာခဲ့သော် မိမိအတွက် ဥပဒေနှင့် အညီ  အကာအကွယ် ရရှိရေး အခက်အခဲ ရှိနိုင်မည် မဟုတ်ပါကြောင်း။     ။

 Written by  ကေတု
 မြ၀တီ မှမျှဝေဖေါ်ပြသည်..