ရှင်ကွဲ (နုနုရည် .. အင်းဝ)

အဖေ့ ကို သတိရလိုက်တာ 

တမာပင်လေးတွေ စီတန်းပေါက်နေတဲ့ လမ်းကလေးထဲကို မြင်းလှည်း ချိုးကွေ့ ၀င်လိုက်တာနဲ့ အိမ်ရဲ့ အနံ့ ကို ကျွန်မ ရတယ်။ ဟိုး..... လွန်ခဲ့တဲ့ အနှစ် သုံးဆယ်ကျော်က ကျစ်ဆံမြီး နှစ်ဖက် ချထားတဲ့ ကောလိပ်ကျောင်းသူ ဘ၀ နဲ့ ပြန်လာတုန်းကလည်း သည် အနံ့ပါပဲ။ 

လုံခြုံနွေးထွေးတဲ့ အိမ်ရဲ့ အနံ့ဟာ ဘယ်တော့မှ ပြောင်းလဲသွားမှာ မဟုတ်ဘူး ထင်ပါရဲ့။ ပြောင်းလဲသွားတာကတော့ ကျွန်မ ပဲပေါ့။ မျက်နှာချင်းဆိုင် မြင်းလှည်း မှန်ချပ်လေး ထဲမှာ နဖူး ဆံစတွေ ဖြူဖွေးစ ပြုနေတဲ့ အသက် ငါးဆယ်ကျော် မိန်းမတယောက်။ 

အိုး... ဟိုမှာ ကျွန်မတို့ အိမ်ကို မြင်ရပြီ ။ ရေနံတွေ မည်းဝနေတဲ့ နှစ်ထပ် အိမ်ကြီးထဲမှာ ကျွန်မအဖေရယ်၊ အမေရယ်၊ မမကြီး ရယ် ရှိတယ်။ ၀မ်းနည်း စရာနဲ့ ပြန်ပြန်၊ ၀မ်းသာစရာ နဲ့ ပြန်ပြန် အိမ်ကိုမြင်လိုက်တာနဲ့ ဘာဖြစ်လို့များ အားရှိ လုံခြုံသွားရတာ ပါလိမ့်နော်။

မန်းကျည်းပင်၊ သရက်ပင်တွေကြားမှာ ငြိမ်သက် တိတ်ဆိတ်နေတဲ့ အိမ်ရှေ့မှာ ခဏ ကျွန်မ ရပ်နေပြီးမှ ၀င်းတံခါး တွန်းဖွင့် ၀င်လိုက်တာနဲ့ ကျွန်မ ရင်တွေ တစ်ဒိတ်ဒိတ် ခုန်လာတယ် ။ အမေ ... အမေ့ ကို ကျွန်မ ဘယ် လို တွေ့ရမှာပါလိမ့်။ သူ အင်မတန် ချစ်တယ် ဆိုတဲ့ အငယ်ဆုံး သမီး ကျွန်မကို အမေ ဘယ်လို ဆက်ဆံမှာ ပါလိမ့်နော်။

'မမကြီး'

အိမ်ရှေ့ တံခါးနား ကနေ မမကြီး ကို ကျွန်မ တိုးတိုးခေါ်လိုက်တယ်။ မမကြီး ကျွန်မကို မျှော်နေတယ် ထင်ပါရဲ့ ။ ချက်ချင်းပဲ အောက်ထပ် အိပ်ခန်းထဲ ကနေ ထွက်လာတယ်။ အဲသည် အိပ်ခန်းဟာ အဖေ နဲ့ အမေ့ အိပ်ခန်း။

' ညည်း မိုးချုပ်မှ ရောက်မယ်ထင်လို့ '

မျက်နှာထား တင်းတင်း၊ စကားပြတ်ပြတ် ပြောတတ်ပြီး အင်မတန် ပါးလှပ်တဲ့ နှုပ်ခမ်း နဲ့ အင်မတန် ပါးလှပ်တဲ့ ကိုယ်ခန္ဓာကို ပိုင်ဆိုင်သူ ကျွန်မ ရဲ့ မမကြီးဟာ ဘာမှ မပြောင်းလဲသလိုပဲ။ ကျွန်မ မလာဖြစ်တဲ့ တစ်နှစ် အတွင်းမှာ ပြောင်းလဲ သွားတာကတော့ မမကြီး ရဲ့ ဖွေးဖွေးလှုပ်နေတဲ့ ဆံပင်တွေပဲ။

မနှစ်က အဖေ နဲ့ အမေ ရဲ့ ရှစ်ဆယ့် ကိုးနှစ်ပြည့် မွေးနေ့ အလှူမှာတုန်းက မမကြီး ဆံပင်တွေ ဒါလောက် မဖြူသေးပါဘူး။ မမကြီးက ကျွန်မအထက်က အဖတ် မတင်တဲ့ အစ်မနှစ်ယောက် ရဲ့ အထက်၊ အေးလေ မမကြီး ငါးဆယ့် ရှစ်နှစ် ရှိပြီပဲ။ ခြောက်ဆယ်နား နီးပေါ့။ ဒါဆို အစ်ကိုကြီးက အသက်ခြောက်ဆယ် ရှိခဲ့ပြီပေါ့နော်။

'အမေရော မမကြီး'

'ဒေါ်လေးတို့ အိမ်မှာ သူတို့ ညီမတွေ ငယ်ငယ်က ဟာတွေ သတိရတယ် ထင်ပါရဲ့အေ။ ဘုရားပွဲ သွားမလို့ တဲ့ ပိုးလုံခြည်တွေ ဘာတွေ ထုတ်ဝတ်ပြီး ဇွတ်ထွက်သွားတာပဲ'

ကျွန်မရင်ထဲ တစ်မျိုးကြီး ခံစားရတယ်။ ပြီးတော့ အဖေ့ ကို ချက်ချင်းသတိရလိုက်မိတယ်။

'အဖေ ရော မမကြီး ဘယ်လိုလဲဟင်'

အလျင်စလို မေးလိုက်တဲ့ ကျွန်မ ကို မမကြီးက ဘာမှ မပြောပဲ အသံပြတ်နဲ့ 'လာ' တဲ့။ အဖေ နဲ့ အမေ အိပ် ခန်း ထဲကို ရှေ့က ၀င်သွားတယ်။ မြန်မာဆေးနံ့၊ ဘုရားပန်းနံ့၊ ပြီးတော့ အဖေ နဲ့ အမေ နဲ့ အနံ့တွေ လွှမ်းခြုံထားတဲ့ အခန်းထဲက ကနုတ်ပန်း အခက်အနွယ်တွေနဲ့ ဟောင်းနွမ်းရှေးကျ ခံ့ညားလှတဲ့ ကျွန်းခုတင်ကြီး ပေါ်မှာ အဖေ အိပ်ပျော်နေရှာတယ်။

'အဖေနေမကောင်းဘူးလား၊ ဒူးနာတာကရော'
'အေး... ဟုတ်တယ်၊ ဒူး ကတော့ ဒီလိုပါပဲအေ၊ အမေ က အဖေ့ ကို လုံးလုံး မမှတ်မိတော့ဘူး'

'ဘာရယ်'
အို.... တစ်ကယ်ပဲလား။ မဖြစ်နိုင်လိုက်တာ။ အမေ ကလား။ အဖေ့ ကို။

'ညည်း ဒီမှာ ကြာကြာနေနိုင်ရင်တော့ ကောင်းမှာပဲ'
'နေနိုင်ပါတယ်၊ နေလဲ နေရမှာပဲ မမကြီးရယ်၊ ကျွန်မ...'

အားကိုး တိုင်တည်ဖို့ ဟန်ပြင်လိုက်တဲ့ ကျွန်မ စကားတွေကို မမကြီး ဘယ်တော့မှ နားမထောင်ပါဘူး။
'ငါ အမေ့ ကို သွားခေါ်လိုက်ဦးမယ်၊ ညည်း အဖေ့နား စောင့်လိုက်ဦး၊ ပြန်မှ ထမင်းစားကြတာပေါ့။ အစ်ကို ကြီး တို့အိမ်က ထမင်းပို့တယ်၊ လာရင် ယူထားလိုက်'

စကားဆုံးတာနဲ့ မမကြီး ခန္ဓာကိုယ် ပါးပါးလေး အခန်းပြင်ဘက်ကို လှစ်ခနဲ ပျောက်ကွယ်သွားခဲ့တယ်။ အဖေ့ ခုတင်ဘေးက ပက်လက် ကုလားထိုင်လေးပေါ်မှာ ကျွန်မ ကိုယ်ခန္ဓာ ကို ပုံချလိုက်မိတယ်။ မမကြီးဟာ ကျွန်မတို့ နှစ်ယောက်ကို ခုထိ ခွင့်မလွှတ်နိုင်သေးဘူးလား။ မမကြီးမှာ တရား မရှိနိုင်သေးဘူးလား။ အနွေးထည် အင်္ကျီအိတ်ထောင်ထဲက ကျွန်မ ရဲ့ ခရီးဆောင် စာအုပ်လေးကို ထုတ်လိုက်တယ်။

'ဗုဒ္ဓယဉ်ကျေးမှု အခြေခံ' တဲ့။ စာအုပ် ရဲ့ ပထမစာမျက်နှာမှာ မမကြီး နဲ့ အဖေ တို့ အမေ တို့က မုန်းတဲ့ ကျွန်မချစ်လင် ရဲ့ လက်ရေးစောင်းစောင်း တွေကို မြင်ရတယ်။ 'ချစ်ဇနီး ခင်ထွေး ရဲ့ အသက် ငါးဆယ်ပြည့် မွေးနေ့ သို့' တဲ့။ ဘုရား ရှိမခိုးတဲ့၊ ဘုရားစာ မရတဲ့၊ တရားလဲ မထိုင်၊ ပုတီးလည်း မစိပ်တဲ့ ကျွန်မ ချစ်လင်ရဲ့ အံ့သြစရာ မွေးနေ့ လက်ဆောင်။ လွန်ခဲ့တဲ့ တစ်ပါတ်က ကျရောက်ခဲ့တဲ့ ငါးဆယ့်နှစ်နှစ်ပြည့် ကျွန်မ ရဲ့ မွေးနေ့မှာ အထီးကျန်ခြင်းကို ကျွန်မ အတွက် မွေးနေ့ လက်ဆောင်ပေးခဲ့တဲ့ ကျွန်မ ရဲ့ ချစ်လင်။





စာအုပ်လေးကို တစ်ဖျပ်ဖျပ် လှန်လှောရင်း 'ဓာရဏ ပရိတ်' ကို အာရုံပြု ရွတ်ဖတ်ဖို့ ကျွန်မကြိုးစားတယ်။

ဆယ့်ငါးပေ၊ ပေငါးဆယ် ရှိတဲ့ အခန်းလေးတစ်ခု၊ ခပ်နွမ်းနွမ်း ပရိဘောဂ အနည်းငယ်။ ကျွန်မ နဲ့ တစ်ချို့ လူတွေ မုန်းပြီး သူမြတ်နိုး ကိုးကွယ်တဲ့ စာအုပ်တွေ အပြည့်။ နေရာအနှံ့ ပုံစံ အမျိုးမျိုး ဆေးလိပ် ခွက်တွေ ။ အလွန် သပ္ပာယ်တဲ့ ဘုရားဆောင်လေး တစ်ခုလဲ ရှိတဲ့ ဒီအခန်းလေးထဲမှာ အိမ်ထောင်သက် အနှစ်သုံးဆယ်နီးပါး ကျွန်မ တို့ ဖြတ်သန်း ခဲ့တယ်။

ကျွန်မ ကောလိပ်ကျောင်းသူဘ၀ တစ်ပိုင်း တစ်စ နဲ့ သူ့နောက် ခိုးရာ လိုက်ခဲ့ကတည်းက တစ်ဖက် က ကျူရှင်ပြရင်း သူ လုပ်ချင်တာတွေ လုပ်ရင်း ချို့တဲ့မှု ဒဏ်ကို ခါးစည်း မခံနိုင်တဲ့ ကျွန်မ က အိမ်ပြန် လက်ဖြန့်ရင် သည် အခန်းလေးထဲမှာ 'သင်း သွေးကို ငါတို့ ချစ်နေရဦးမယ်၊ နင်တို့ သားသမီး မရစေနဲ့' လို့ ဆိုတဲ့ မမကြီး ကျိန်စာ ကလည်း ကျွန်မ တို့ကို ထိခဲ့တာကိုးနော်။

စာအုပ်လေးကို ကျွန်မ ပိတ်လိုက်တယ်။ မသိမသာ လူးလွန့်လိုက်တဲ့ အဖေ့ ကို ကြည့်ရင်း ကျွန်မ၀မ်းနည်းလာတယ်။ ကျွန်မ ဘယ်သူ့ကို ပြောရမလဲ။ ညသန်းခေါင် ရဲ့ ဆူညံ လှုပ်ခါနေတဲ့ လူခေါ် ကြေးခေါင်းလောင်းသံ။ ပြီးတော့ သူစိမ်းတွေ။ သူစိမ်းတွေနဲ့အတူ ကျွန်မရှေ့က ဖျတ်ခနဲ ပျောက်ကွယ်သွားပြီး အထီးကျန်ခြင်းကို ကျွန်မ အတွက် ထားရစ် ခဲ့တဲ့ ကျွန်မ ချစ်လင်။ ကျွန်မ သိပ်ကြောက်တာပဲ အဖေ။ သူသာဆိုရင်တော့ ကျွန်မကို ပြောဦးမယ်။ 'မင်းဟာ ဘယ်တော့မှ ကြီးပြင်းမယ့် မိန်းမ မဟုတ်ဘူး လို့'။

မှောင်စပြုလာတဲ့ အခန်းထဲမှာ မီးဖွင့်ဖို့ ကျွန်မ ထလိုက်တယ်။ မီးဖွင့်ပြီး အဖေ့ခုတင်နား ကျွန်မပြန်လာ တော့ အဖေရယ် နိုးနေပြီ။ ဒါပေမယ့် အဖေ ကျွန်မ ကို ဘာမှ မပြောခဲ့ပါ ။ သူ့ မျက်လုံးတွေ ဟိုဟို သည်သည် လိုက်ကြည့်နေတယ်။ ပြီးတော့မှ 'ညည်း အမေရော' တဲ့။ ကျွန်မ ငယ်ဘ၀ တစ်လျှောက်လုံး ကြားခဲ့ရတဲ့ အဖေ့ ရေရွတ်သံ။ ကျွန်မ ဘာပြောရမလဲ။

'အမေ လား အဖေ'
ကျွန်မ စကားထစ်နေဆဲ အဖေ့ မျက်နှာ ဖျတ်ခနဲ ညှိုးနွမ်းသွားပြီး မျက်လုံးတွေ ပြန်မှိတ် ပစ်လိုက်တယ်။ ခု တင်ဘေး စားပွဲလေးပေါ် ဓာတ်ဗူးလေးထဲက နွားနို့ ကို အဖေသောက်နေကျ လက်ဖက်ရည် ပန်းကန်ပြား အပက်လေးထဲ ကျွန်မ ငှဲ့ထည့်လိုက်တုန်း......။

'စိတ်ချ၊ နက်ဖြန်ကျ လိုက်ပို့ပါ့မယ်လို့ဆို'
ဟော မမကြီး အသံ။ အမေ လာပြီလား။ အဖေ့ မျက်လုံးတွေ ပြန်ပွင့်လာတယ်။ ကျွန်မ ရင်တွေလဲ တစ်ဒိတ် ဒိတ် ပြန်ခုန်လာတယ်။ အမေ ဘယ်လို ဖြစ်နေမှာလဲ။

'လာပါ အမေရဲ့'
အခန်းဝမှာ မမကြီး နဲ့ အမေ ရုတ်တရက် ပေါ်လာတယ်။

'အမေ'
ပါးရေတွန့် ပါးပြင်မှာ သနပ်ခါးတွေ နဲ့ အမေ က ကျွန်မ ကို စိမ်းစိမ်းကြည့်နေတယ်။ လန်းဆန်း တက်ကြွမှု တမျိုး ပူးကပ်နေတဲ့ အသက်ကိုးဆယ် အရွယ်၊ ကျွန်မ ရဲ့ အမေ ဟာ ကျွန်မကို ကြည့်ရာက အဖေ့ ဆီကို ဖျတ်ခနဲ လှမ်းကြည့်လိုက်တယ်။ ပြီးတော့ ကျွန်မ ငှဲ့လက်စ နွားနို့ ပန်းကန်ပြားလေးပေါ်။ အို.... အမေ သတိရပါစေ။ ကျွန်မ မျက်စိထဲမှာ အဖေ့မေးစေ့အောက်မှာ လက်ကိုင် ပုဝါလေးခံပြီး နွားနို့ ပန်းကန်ပြားလေးကို တိုက်နေ တဲ့ အမေ။ အဖေ့ ဒူးကို အမြဲတမ်း နှိပ်ပေးနေတဲ့ အမေ။ 'နင့် အဖေရော' ဆိုတဲ့ အမေ့ ပူပန်သံနဲ့ ပျာယာ ခတ် အမူအရာ၊ ကျွန်မ အမေ့ကို မျှော်လင့်တစ်ကြီး ကြည့်မိတယ်။ ပြီးတော့ နွားနို့ ပန်းကန်ကို ကျွန်မကောက် ကိုင်လိုက်ရင်း......

'ရော့လေ အမေ၊ အဖေ့ ကို'
ကျွန်မ စကားမဆုံးခင်မှာပဲ အမေ ဟာ အဖေ့ ကို လက်ညှိုးငေါက်ငေါက် ထိုးလိုက်တယ်။
'ဒီ အဘိုးကြီးက ဘယ်ကလဲ၊ သူများ အိမ်မှာ ဘာလာ လုပ်နေတာလဲ။ ခုထိ မပြန်သေးဘူးလား၊ မိုးချုပ်လှပြီ'

'အို..... အမေ'
မျက်စိ စုံမှိတ်လိုက်တဲ့ အဖေ့ မျက်နှာကို ကျွန်မ တစ်သက်မမေ့နိုင်တော့ပါ။
'ဟဲ့ အဘိုကြီး ကိုယ့်အိမ် ကို ပြန်လေ။ မိုးချုပ်လှပြီဆို၊ အသားအရေတွေ က ဖြူဖပ်ဖြူရော်နဲ့ အဲ့ဒါ ဘယ်က တရုတ် အဖိုးကြီးလဲ ဟင်၊ ဘယ်ကလဲ'

မမကြီးက အမေ့ ကို အတင်း ဆွဲခေါ်သွားတယ်။ 'အဖိုးကြီး ပြန်တော့' ဆိုတဲ့ အမေ့အော်သံ သဲ့သဲ့ကို ကျွန်မ တစ်ကယ် ကြားနေရတာပါလား။ အမေ ဟာ အဖေ့ ကို လုံးလုံး မမှတ်မိတော့ဘူး။ ဖြစ်နိုင်ပါ့မလား။ အိမ်ထောင်သက် အနှစ် ငါးဆယ်ကျော် တစ်လျှောက်လုံး အမေ ဟာ အဖေ့ ကို ဘယ်လောက် မြတ်နိုးခဲ့သလဲ။ ဘယ်လောက် ယုယခဲ့သလဲ။


xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx


"ညည်းတို့ အမေ၊ ညည်းတို့ အဖေ ကို ယုယပုံများတော့ ငါတို့ တစ်သက် တွေ့ဖူးပေါင်အေ၊ အရိပ်ကြည့်နေ တယ် ဆိုတာမျိုးပေါ့။ ညည်းတို့ အဖေ ဟာလေ ထမင်း တို့ ဟင်းတို့၊ လက်ဖက်ရည်ချို တို့၊ ကော်ဖီတို့ ဆိုတာတွေဟာ ပန်းကန်ပြား၊ ပန်းကန်လုံးထဲမှာ ဖြစ်တာလို့ သိတော့တာ။ သူ့ရှေ့မှာ စားစရာ သောက်စရာ ချထားရင် မစားတတ်တော့ဘူး။ ညည်းအမေ က ကောက်ယူပြီး 'ရော့ ... ကိုမောင်သန်း စားလေ' ဆိုတော့မှ စားတာ။

တစ်ခါများ ညည်းတို့ အမေက ထမင်းပွဲ ပြင်ပေးခဲ့ပြီး ဧည့်သည်လာလို့ ဧည့်သည် နဲ့ စကားပြောနေတယ်။ တော်တော် လည်း ကြာသွားတယ်။ ဧည့်သည်ပြန်တော့မှ ထမင်းစားပွဲဆီ ၀င်လာတော့..... အမယ်လေးတော် ပြောချင်ဘူး။ မောင်မင်းကြီးသား ထမင်းဝိုင်းမှာ သည်အတိုင်း ငုတ်တုတ်။ ညည်းအမေ က 'စား' လို့ မပြောသေး လို့။ အဖြစ်က။

တစ်ယောက် နဲ့ တစ်ယောက် ချစ်ချစ် ခင်ခင် ကြင်ကြင်နာနာ မို့လား မသိပါဘူးအေ စီးပွါး ကလဲ ဖြစ်လိုက်တာ။ ညည်းအမေ မထိုက်ကလည်း တော်ပါပေတယ်။ သန်းထိုက် သစ်စက် ဆိုတော့ တစ်နယ်လုံး ဟိုးဟိုးကျော်ပေါ့။

အဲ .... ညည်း အဖေ ဒူး မဖြတ်ရတာလဲ ညည်း အမေကြောင့်ပဲ။ ညည်းမွေးပြီးစလေးပေါ့။ ညည်းအဖေ ဖြစ်တာ။ မြို့ပြင် သံလမ်းတွေဆီ သွားပြီး ကန်ထရိုက် သွင်းရဖို့ ဇလီဖားတုံးတွေကို သွားကြည့် တာလေ။ မြို့ဝင် လမ်းမှာ မန်းကျည်းပင်ကြီးတွေကို လှဲပြီး ထင်းလုပ်နေကြသတဲ့။ ညည်းအဖေက ကားလေးနဲ့တဲ့။ မောင်းတဲ့ လူလဲ ရှိပါတယ်။ အဲ့ဒါ လွတ်ပါတယ် ဆိုပြီး ကားဖြတ်မောင်းတာ တစ်ခါတည်း မန်းကျည်းပင်ကြီးတစ်ပင်က သူ့ကားပေါ် တည့်တည့်ကျတော့တာပဲ။

ကားလေးဟာ တစ်ခါတည်း ပြားချပ် သွားတော့တာပဲ။ မောင်းတဲ့လူ ကတော့ ပွဲချင်းပြီးပေါ့။ ညည်း အဖေက နောက်ခန်းမှာ ထိုင်လာတော့ လူတော့ မသေဘူး။ ကားထဲမှာ ခြေထောက်တွေ ညှပ်နေတာ ဆွဲထုတ်လို့ မရဘူး။ အမလေး ... ညည်းအမေက ဘယ်လောက် သတ္တိကောင်းတယ် မှတ်လဲ။ ဒါလောက်ချစ်တဲ့ ယောက်ျားနော် ။ ဦးမောင်သန်းကြီး ကား မန်ကျည်းပင် ပိလို့တဲ့ဗျို့ ဆိုပြီးကြားတော့ ငိုလိမ့်မယ် မှတ်လား။ ညည်းကို ရင်ခွင်ထဲက ချပြီး သစ်စက် ကို ပြေးတာပဲ။ သစ်စက် က ရှိသမျှလူခေါ်၊ သစ်လုံး မတဲ့ ဟာကြီးတွေ ယူဆို ပြီး အကုန် စီစဉ်တာ။ ဟိုရောက်တော့ ညည်းအဖေ ကလေ ပေါ်နေတဲ့ ခေါင်းလေး တစ်ယမ်းယမ်းနဲ့တဲ့။

'ဟာ ... မထိုက်၊ ငါပြန်လာမှာပေါ့ကွာ၊ ဘာလို့ လိုက်လာတာလဲ' လို့ ပြောသေးသတဲ့။ တစ်ခါတည်း တစ်စ ချင်း ဆွဲဖယ်ပြီးမှ လူ ကို ထုတ်ရတာ။ ခြေထောက်နှစ်ဖက်စလုံး အရိုးတွေ ကျိုးကုန်တယ်။ အိုး..... ကုလိုက်ရတဲ့ အမျိုး။ မရွှေထိုက်တို့ ကတော့ လူ အားရော၊ ငွေ အားရော၊ ဒါပေမယ့် ဆရာဝန်က မရဘူး။ ဖြတ်ပစ်ရမယ် ဆိုပြီး ပြောရော။ အဲ့ဒါ ညည်းအမေက မဖြတ်ပါရစေနဲ့ဦး။ သူကြိုးစား ကြည့်ပါရစေဦး ဆိုပြီး ဆေးဆရာ ရှာတာလေ။

နောက်ဆုံး ညည်း အမေ မေတ္တာကြောင့် ထင်ပါရဲ့။ ရှမ်းဆရာကြီး တယောက်နဲ့ တွေ့ပြီး ဆေးစည်းတာနဲ့ အရိုးတွေ ပြန်ဆက်ပြီး ခြေထောက် မဖြတ်ရတော့ဘူး။ အဲဒီ ကတည်းက ညည်း အမေ ညည်း အဖေ ခြေထောက်တွေကို အမြဲတမ်း နှိပ်ပေးတဲ့ အကျင့်ဖြစ်သွားတော့တာပဲ။ ညည်း အဖေ ပက်လက် ကုလားထိုင်ပေါ် ထိုင်တာနဲ့ ဘေးကနေပြီး နှိပ်ပေးနေတော့တာပဲ။ သစ်စက် အလုပ်တွေကိုလဲ မလုပ်ခိုင်းတော့ဘူး။"

ကျွန်မ တို့ ငယ်ငယ်တုန်းက မေမေ့ ညီမ ဒေါ်လေးသိုက် ပြောပြတတ်တဲ့ အဖေ နဲ့ အမေ အကြောင်းဟာ အိပ် ရာဝင် ပုံပြင်တွေလို နားထောင်လို့ သိတ်ကောင်းခဲ့တာပေါ့။ ကျွန်မတို့ ကြီးတဲ့ အထိလဲ သမီးတွေ ကျွေးတာ တောင် မစားပဲ အမေကျွေးမှ စားတာတဲ့။ ခဏလေး အမေ့ မမြင်တာနဲ့ 'ညည်းအမေရော' လို့ မေးတတ်တဲ့ အဖေ့ ကို ကျွန်မတို့ ရယ်ပွဲ ဖွဲ့လို့ မဆုံးနိုင်ခဲ့ပါဘူး။

အဖေ နဲ့ အမေ ညအိပ် ညနေ ခွဲပြီး ခရီးသွားတာကိုလည်း ကျွန်မ သိတတ်စ အရွယ်ကတည်းက တစ်ခါမှ မတွေ့ခဲ့ဘူးပါဘူး။ အမေ သစ်စက်သွားတဲ့ အချိန်လောက်ပဲ ခဏ ခွဲနေတာ။ အစ်ကိုကြီး အိမ်ထောင်ကျပြီး သစ်စက် ကို ဦးစီးနိုင်တာနဲ့ အဖေ့ နားမှာပဲ အချိန်ပြည့် နေတော့တာပဲ။ ပက်လက် ကုလားထိုင်ပေါ်မှာ အဖေထိုင်ပြီး၊ ကြမ်းပေါ်မှာ အမေ က ကျုံ့ကျုံ့ ကလေးထိုင်လို့ အဖေ့ခြေထောက်တွေကို နှိပ်ပေးနေတဲ့ မြင်ကွင်းဟာ ကျွန်မ တို့ အမြဲတမ်း တွေ့နေကျ မြင်ကွင်းပေါ့။

အမေ ရယ်။ အိပ်မပျော်နိုင်တဲ့ ကျွန်မ စိပ်ပုတီး တစ်ချောက်ချောက် စိပ်ရင်း ဘယ်ညာ လူလှိမ့်နေမိတယ်။ အဖေ အိပ်ပျော်ရှာရဲ့လား။ အဖေ နဲ့ အမေ တစ်ခါ မှ ခွဲ မအိပ်ဖူးဘူးနော်။ အထီးကျန်ခြင်း ဝေဒနာ ဆိုတာကို အမေ မသိပါဘူး အမေရယ်။ သိပ်ဝမ်းနည်းစရာ ကောင်းတာ။ အဖေ့ ချောင်းဆိုးသံက ကျွန်မ ကို ပိုဝမ်းနည်းလာ စေတယ်။ စိမ့်ကျလာတဲ့ မျက်ရည်တွေကို ကျွန်မ လက်နဲ့ ပွတ်သုတ်လိုက်တော့ စိပ်ပုတီး မှာပါ မျက်ရည်တွေ ရောနှော စွတ်စိုကုန်တယ်။

'နည်းနည်းလောက်တော့ သောက်လိုက်ပါ အဖေရယ်နော်၊ အဖေ ည ကလည်း ဘာမှ စားတာ မဟုတ်ဘူး၊ နွားနို့လေး နည်းနည်းလေးနော်... အဖေနော်'

မနက်လင်းတယ် ဆိုကတည်းက ကျွန်မ ဘယ်လိုပဲ ကြိုးစား တိုက်တိုက် နွားနို့ပန်းကန်ကို အဖေ ခေါင်းယမ်းလို့ချည်း နေတော့တယ်။ ပါးစပ် က မမေးပေမယ့် အဖေ့မျက်လုံးတွေက အခန်းဝကိုချည်း ကြည့်လို့နေတယ်။ အဖေ ရယ်။

'ပက်လက် ကုလားထိုင်ပေါ် ပြောင်းထိုင်ရအောင်နော် အဖေ၊ ကျွန်မရွှေ့ပေးမယ်၊ ဒါမှ အဖေ အညောင်း မမိမှာ'

အဖေခေါင်းယမ်းနေတဲ့ ကြားထဲကပဲ ကျွန်မ အဖေ့ ကို ပက်လက် ကုလားထိုင်ပေါ် ကို အသာအယာ တွဲပို့ ဖို့ ကြိုး စားနေတုန်း

'ဟေ့ .... အဖိုးကြီး မပြန်သေးဘူးလား'

အခန်းဝ ကနေ ရုတ်တရက် ပေါ်လာတဲ့ အမေ့ အသံ ကျယ်ကျယ်ကြောင့် အဖေရော ကျွန်မ ပါ လန့်ဖျပ်တုန်ယင် သွားခဲ့ပါတယ်။ ပိုးလုံချည် အစိမ်း တွန့်တွန့် ဖြူညစ်ညစ် ပုဝါကို ကျကျနန ခြုံထားတဲ့ အမေ က အဖေ့ ကို ကြည့်နေတယ်။ အဖေ ကတော့ အမေ့ ကို မကြည့်ပါဘူး။ အဖေ့ ကို ပက်လက် ကုလားထိုင်ပေါ် တွဲချ ထိုင်ခိုင်း ပြီးတာနဲ့ အခန်းထဲကို ဖျိုးဖျိုးဖျတ်ဖျတ် နဲ့ ၀င်လာတယ်။ ပြီးတော့ အဖေ့ဘေးနား ကြမ်းပေါ်မှာ ထိုင်ချလိုက်တယ်။ ပြီးတော့ အဖေ့ခြေထောက်တွေကို ဖြည်းဖြည်း.... ဖြည်းဖြည်းချင်း။

'အို .... အမေ'

ကျွန်မ ရဲ့ ၀မ်းသာအားရ သံနဲ့ အတူ အဖေ့ မျက်နှာကြည်လင် သွားပုံဟာလည်း မယုံနိုင်လောက်အောင် ပါပဲ။ ဒါပေမယ့် အမေ ကလေ......

'ဒီ အဘိုးကြီးက တို့အိမ်ဘာလို့ လာနေတာလဲ၊ သူ့မှာ အိမ် မရှိဘူးလား၊ မြန်မြန် ပြန်လွှတ်လိုက်စမ်း၊ ဘယ်ကလဲ ဒီ အဖိုးကြီးဟာ...'

အမေရယ် ပါးစပ်က ပြောချင်တာတွေ တွင်တွင်ပြောပြီး အဖေ့ခြေထောက်တွေကို ဖြည်းဖြည်းချင်း တစ်ယု တစ်ယ နှိပ်ပေးနေတဲ့ အမေ့ ကို မကြည့်ချင်တော့ပါဘူး။

အမေ အခန်းထဲက ပြန်ထွက်သွားတာနဲ့ ခုတင်ပေါ်က ဇာခြင်ထောင် ထူထူအောက်ကို အဖေပြန်ဝင်သွား ခဲ့တယ်။ ဘာမှလဲ ကျွေးလို့ မရဘူး။

နေ့လယ်လောက် ကျတော့ အဖေ့ ကို နွားနို့ နဲ့ မုန့်လေးကျွေးဖို့ ကျွန်မ နဲ့ မမကြီး ကြိုးစားရပြန်တယ်။ အဖေကတော့ ခေါင်းယမ်းမြဲ။ အပေါ့ အပါး သွားပြီးတာနဲ့ ခြင်ထောင်အောက် ကိုပဲ ပြန်ဝင်ဖို့ လုပ်တော့တာပဲ။ ပက်လက် ကုလားထိုင်ပေါ်ကို ရွှေ့လို့ အဖေ ပက်လက် ကုလားထိုင်ပေါ် ရောက်တာနဲ့ အမေရယ်လေ ဗြုန်းဆို ပေါက် ချလာပြီး.......

'ဒီအဖိုးကြီး မပြန်သေးဘူးလား၊ ဘယ်ကလဲ ဒီ အဖိုးကြီးနဲ့' ပါးစပ်က ဘာတွေ ပြောပြော အမေ က အဖေ့ ပက် လက် ကုလားထိုင်ဘေးမှာ ထိုင်ပြီး ယုယုယယ နှိပ်နေပါပြီ။ အမေ ရယ်။ မမကြီး က မျက်ရည်ကျ နေ တယ်။


xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx


ညနေကျတော့လည်း ခြင်ထောင်ထဲက မထွက်တော့တဲ့ အဖေ့ ကို ကျွန်မ ဇွတ် ချော့မော့ပြီး အပြင်ကို ခေါ် ထုတ်ရပြန်တယ်။ ကျွန်မ မျက်ရည် တစ်ဝဲ ၀ဲနဲ့ တိုက်တဲ့ နွားနို့ ပန်းကန်ကို သည်တစ်ခါတော့ အဖေ က ကြည့် တယ်။ ပြီးတော့ ကျွန်မ ကို သေချာ စိုက်ကြည့်နေပြီး ပက်လက် ကုလားထိုင်ပေါ် ပို့ဖို့ ပြတယ်။
ကုလားထိုင်ပေါ်ရောက်ပြီးမှ အဖေ ပြန်ထတယ်။ အိပ်ရာပေါ်ကို ဇွတ် လက်ညှိုးထိုးပြနေတယ်။ 'ပို့ ပို့' တဲ့။

'အဖေ ကလဲ နွားနို့လေး သောက်ပြီးမှ ပြန်အိပ်ပါ။ ဒီမှာ ခဏလေး နေလိုက်ပါဦး'
အဖေခေါင်းကို ယမ်းပြီး ကျွန်မ ကို သနားစရာ ကြေကွဲစရာ အကြည့်နဲ့ မော့ကြည့်တယ်။ ပြီးတော့မှ တိုးတိုးလေး 'ညည်းအမေ မြင်ရင် အဖေ့ ကို နှင်လိမ့်မယ်' တဲ့ ။ အို.... အဖေရယ်။

ကျွန်မ ရုတ်တရက် ဘာမှ ပြန်မပြောနိုင်အောင် စိတ်ထိခိုက်ရတယ်။ အေးစက်စက် အဖေ့လက်တွေကို ကျွန်မ ကြင်ကြင်နာနာ ကိုင်ထားလိုက်တုန်းမှာပဲ အမေရယ်လေ....

'မိသိုက် ကအေ သိပ်ညစ်တာပဲ၊ တော်ပြီ ဒီကောင်မ နဲ့ နောက် မကစားဘူး'
ဒေါ်လေးသိုက် တို့ အိမ်က အပြန် အကြီးအကျယ် အော်ဟစ်သောင်းကျန်း လာတဲ့ အမေ က အဖေ့ အခန်း ၀ ကိုတော့ တန်းတန်း မတ်မတ်လာတယ်။ ပက်လက်ကုလားထိုင်ဆီ ကိုလဲ တန်းတန်းမတ်မတ်။ ပြီးတော့ အဖေ့ခြေထောက်တွေကိုလည်း တစ်ယု တစ်ယ။ ဒါပေမယ့် အဖေ့ ကို စူးစူးကြည့်လို့.....

'ဟဲ့ အဘိုးကြီး သူများအိမ် ကို အားမနာဘူးလား၊ မရှက်ဘူးလား ၊ ပြန်ပါတော့လား ၊ ကိုယ့် အိမ်ကို မပြန်ရင်လေ မပြန်ရင်'

အမေ က နှိပ်နေတာကို ရပ်ပြီး ခဏ စဉ်းစားတယ်။ ပြီးတော့မှ အားရ ပါးရ ဆက်နှိပ်ရင်း 'ရိုက်ထုတ်မယ်၊ ရိုက် ထုတ်မယ်ဟေ့' တဲ့။

'အမေ ကလဲနော်'

မမကြီး နဲ့ ကျွန်မ က စိတ်ထိခိုက် ညစ်ညူးပေမယ့် အဖေ ဟာ ဒီတခါတော့ ထူးထူး ဆန်းဆန်း မျက်နှာ မလွှဲပဲ အမေ့ ကို စိုက်ကြည့်နေခဲ့တယ်။ ဒါပေမယ့် အဖေ့ မျက်နှာကတော့ ကြေကွဲစရာ အကောင်းဆုံး၊ ၀မ်းနည်းစရာ အကောင်းဆုံး မျက်နှာ။ အဲ့သည် ည မှာပဲ အဖေ ဆုံးသွားရှာပါတယ်။


xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx


ပြတင်းပေါက်က ၀င်တဲ့ လေ အရှိန်နဲ့ တစ်ဖျပ်ဖျပ် လွင့်နေတဲ့ ဇာခြင်ထောင်ကို ကျွန်မ နဲ့ မမကြီး မွေ့ရာအောက် မှာ သပ်သပ် ရပ်ရပ် ဖိလိုက်ကြတယ်။ ပက်လက် ကုလားထိုင်ကိုလည်း နေသား တစ်ကျ။ ခုတင်ဘေးက စားပွဲလေးပေါ်မှာလည်း နွားနို့ဓါတ်ဗူး နဲ့ ပန်းကန်ပြားလေးကို အဖေ ရှိနေတုန်းကလိုပဲ သေသေ သပ်သပ် ချထားပါတယ်။ အခန်းဝ က ကြည့်လိုက်ရင် ခြင်ထောင်ထဲမှာ အဖေ ရှိနေသလို ပေါ့နော်။ မမကြီး ဆီက ကြိတ် ပြီး ရှိုက်သံ ကြားရတယ်။

'ငါ့ကို ဘာဖြစ်လို့ မိသိုက် တို့အိမ် ညအိပ် ခိုင်းရတာလဲ၊ ပြောစမ်းပါဟဲ့'

ဟော အမေပြန်လာပြီ။ အမေပြန်လာရှာပြီ။ မမကြီး က မျက်ရည်တွေကို ကဗျာ ကယာ သုတ်တယ်။ အမေ့ကို ခေါ်လာတဲ့ အစ်ကိုကြီး ရဲ့ 'အမေကလဲဗျာ' ဆိုတဲ့ စိတ်မကောင်းသံကို ကြားရတယ်။

'သူများ အိမ်မှာ အပျို အရွယ်လေး ည သွားအိပ်လို့ မကောင်းဘူး ဆိုတာ နင်တို့ မသိဘူးလား။ ငါတစ်စက်မှ အိပ်မပျော်ဘူး။ ဒီနေ့ညသာ ဆက်အိပ်ရရင် မိသိုက်တို့ အိမ် မီးနဲ့ အရှို့ပဲ'

ကျွန်မ နဲ့ မမကြီး အခန်းထဲက မြန်မြန် ထွက်လိုက်ကြတယ်။ ဧည့်ခန်းထဲမှာ အမေက ဆွဲထားတဲ့ အစ်ကိုကြီး လက်တွေကို ရုန်းဖယ်လို့။

'ဒီမှာ ထိုင်ရအောင်လေ အမေ'
အမေ က ခေါင်းကို သွက်သွက်ခါ ယမ်းရင်း ကျွန်မ နဲ့ မမကြီးကို လှမ်းကြည့်တယ်။ ပြီးတော့ ကျွန်မတို့ နှစ်ယောက်ကြားက ဖြတ်ပြီး အိပ်ခန်းဆီကို တန်းတန်းမတ်မတ်။

'အမေ'
ကျွန်မ လွှတ်ခနဲ ခေါ်လိုက်ရင်း အမေ့နောက် မြန်မြန် လိုက်ခဲ့တယ်။ အမေ က အခန်းဝမှာ ရပ်ပြီး ခုတင်ကို ငေးကြည့်နေတယ်။ ပြီးတော့ အခန်းထဲ ဖြည်းဖြည်းချင်း ၀င်သွားတဲ့ အမေ့ ကို နောက်ကနေ ကျွန်မတို့ မောင်နှမသုံးယောက် အသက် မရှူဘဲ ကြည့်နေမိကြတယ်။ အမေ က ခုတင်ကို တစ်ပတ်ပတ် လိုက်တယ်။ ပြီးတော့ ပက်လက်ကုလားထိုင်လေးကို လက် နဲ့ ထိကြည့်တယ်။ ပြီးတော့ အခန်းထဲကို လှည့်ပတ်ကြည့်ရင်း ဘုရားစင် စားပွဲခုံပေါ် ထောင်ထားတဲ့ အဖေ့ ဓါတ်ပုံကို မြင်တော့ ဟက်ဟက် ပက်ပက် ရယ်ချလိုက်တယ်။

'အမေကလည်းဗျာ'

အစ်ကိုကြီးက သက်ပြင်းတစ်ချက်ကို ချလို့ ခုတင်ဘေးက ပက်လက် ကုလားထိုင်ပေါ်မှာ ခြေပစ်လက်ပစ် ထိုင် ချလိုက်တယ်။ အဖေ့ ဓါတ်ပုံကို ကြည့်နေတဲ့ အမေ ဟာ သည်ဘက် လှည့်လိုက်တာနဲ့ ပက်လက်ကုလားထိုင်ပေါ်က အစ်ကိုကြီး ကိုလည်း မြင်ရော အံ့သြသလို မျက်နှာပြောင်းလဲ သွားရင်း ပက်လက် ကုလားထိုင်ဘေး ကို ချက်ချင်း ရောက်လာတော့တယ်။ ပြီးတော့ ကျုံ့ကျုံ့ကလေး နဲ့ အစ်ကိုကြီး ခြေထောက်တွေကို ဖြည်းဖြည်းချင်း တယုတယ နှိပ်တော့တာပါပဲ။

'အမေ'
အစ်ကိုကြီးက သူ့ မျက်နှာကို လက်ဝါးနဲ့ အုပ်လိုက်တယ်။ အမေ ကတော့ အားရပါးရ နှိပ်နေရင်းကနေ အစ်ကိုကြီး ဆီက တအစ်အစ် နဲ့ ရှိုက်သံ ထွက်လာတော့ ဖြည်းဖြည်းချင်း အစ်ကိုကြီး ကို မော့ကြည့်တယ်။ ပြီးတော့ ဘာမှ မဖြစ်သလို ဆက်နှိပ်ပြန်တယ်။ ဒါပေမယ့် တစ်ဖြည်းဖြည်း လှုပ်ရှားနေတဲ့ အမေ့လက်ချောင်း ပိန်ပိန်လေးတွေ နှေးကွေးသွားပြီး ခဏနေတော့ ဆတ်ခနဲ ထပြီး အခန်းထဲက ထွက်သွားတော့တယ်။


xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx

'ခင်ထွေး .... သမီး'
အဖေ့ အိပ်ရာဆီကို လှမ်းလိုက်တဲ့ ကျွန်မ တစ်ကိုယ်လုံး တုန်လှုပ် သွားခဲ့တယ်။ အမေ။ နံနက်လင်းစ မှောင်ရီရီ အလင်းရောင်အောက်မှာ အမေ ရယ်လေ။ ခြင်ထောင်ဘေးမှာ ရပ်လို့။ အမေ မနိုးခင် အဖေ့ အိပ်ရာကို နေသား တစ်ကျ ဖြစ်အောင်လို့ ကျွန်မ အစောကြီး ထလာခဲ့တာ။

'အမေ'
ခုတင်ဘေးမှာ တည်ငြိမ် ခံ့ညားစွာ စိုးရိမ် ပူပန်ကြီးတတ်တဲ့ အမူအရာ နဲ့ ရပ်နေတဲ့ အမေ ဟာ ကျွန်မတို့ရဲ့ အလျင်က အမေ ပေပဲလား။

'သမီး'
ကျွန်မ နားကြား မလွဲပါဘူးနော်။ အမေ့နားကို တိုးကပ်ရင်း အမေ့ လက်တွေကို ၀မ်းသာ အားရ ကျွန်မ ဆွဲယူမိလိုက်တယ်။

'အို အမေ့ လက်တွေ အေးစက်နေတာပဲ'
'ဖယ်စမ်းပါ'

အမေ က သူ့ လက်တွေကို ပြန်ဆွဲယူရင်း အလျင်စလို နိုင်လှတဲ့ ဟိုတုန်း က အမေ့လေသံနဲ့...
'ညည်းအဖေရော'

'ဟင်'
'ညည်း အဖေ ဘယ်မှာလဲ၊ ညည်း အဖေ ဘယ်ရောက်သွားလဲ'

ဘုရား ဘုရား၊ ကျွန်မ ဘာပြောရမလဲ။ အမေလေ ကျွန်မ လက်တွေကို ဆွဲခါ လှုပ်ရမ်းနေတယ်။
'ပြောလေ၊ ညည်း အဖေရော လို့ဆို'
'အဖေ ရှိပါတယ်'
'ဘယ်မှာလဲ'
'ရှိပါတယ်'
'အို မရှိပါဘူး၊ ငါ အရုဏ်တက် ကတည်းက ညည်းတို့ မနိုးခင် ကတည်းက လိုက်ရှာနေတာ၊ တစ်အိမ်လုံးနှံ့နေပြီ'
'ပြောစမ်းပါအေ ဘယ်မှာလဲ'
'...........'



'ညည်းတို့ ဘယ်ကို ပို့ထားကြသလဲ ဟင်'
'မပို့ပါဘူး အမေရယ်'
'အို အေ'

မျက်ရည်တွေ လိမ့်ဆင်း ကျလာတဲ့ ကျွန်မ ကို အမေ က စိတ် မရှည် သလို တွန်းလိုက်ပြီး အမေ့ ခန္ဓာကိုယ် လေးဟာ ခုတင်ပေါ်ကို အ၀တ်ပျော့လေးတစ်ခုလို ပုံကျ သွားခဲ့တယ်။ အမေ တင်ထားတဲ့ ဇာခြင်ထောင်အောက် က အိပ်ရာ ရဲ့ ဘယ်ဘက်ခြမ်းပေါ်မှာ ခွေခွေလေး။ အမေ့ မျက်နှာက အဆမတန် အိုမင်းနွမ်းနယ်နေ ပြီး အမေ့ မျက်လုံးမှာ ဒေါသ နဲ့ စိုးရိမ်သောကတွေ။ အမေ့ ဆီမှာ ပူးကပ်နေတဲ့ လန်းဆန်း တက်ကြွမှုတစ်မျိုး ဘယ်ရောက် သွားပြီလဲ။ အမေ က ခြင်ထောင် အမိုးကို အကြာကြီး စိုက်ကြည့်နေရာကနေ ကျွန်မ ဘက်ကို ဆတ်ခနဲ လှည့်ကြည့် လိုက်တယ်။


'အသက် ရှင်ရက်တော့ ငါတို့ ကို ခွဲမထားကြပါနဲ့အေ'
အမေ့ ရဲ့ တောင်းပန် ညည်းညူသံဟာ ကျွန်မ ကို နာကျင်စေပါတယ်။
'ရှင်ကွဲ, ကွဲရတဲ့ ဒုက္ခ ကို ညည်းတို့ မသိပါဘူး'


အို ...... အမေ ရယ်။ ကျွန်မ မသိဘဲ ရှိပါ့မလား။ ကျွန်မ ခံစားနေရတာပဲ အမေ။ အမေ့ လို ကျွန်မ ပေါက်ကွဲ ပါရစေတော့။ အမေ နားထောင်ပါနော်။ တစ်ဖက်စောင်းသွားတဲ့ အမေ့ ရဲ့ လက်တွေကို ကျွန်မ ဆွဲယူလိုက်တဲ့အခါ အမေ အသက် မရှိတော့ပါဘူး။



နုနုရည် အင်းဝ။
Posted by Maung Aye Win
https://plus.google.com/u/0/